Pakikinig

ni Raymund B Villanueva

Gustuhin ko mang magtakip ng tenga

magbusal ng tutule

lumabas ng kwarto

Hindi ko gagawin

Uupo ako rito

Kumpareng Raymond Manalo

Nanay Linda Cadapan

Makikinig muli sa inyong kwento

Ilang beses ko mang narinig na

Ang makapanindig balahibong salaysay

ng pagdukot

ng toryur

ng pambababoy

ng walang kapantay na kahayupan

Makikinig muli ako ng inyong mga kwento

Kasama niyo ako rito sa bulwagan

Katulad ninyong lalamig ang dugo

manghihina

magagalit

maiiyak

malulungkot ng pagkalalim-lalim

Ayaw

ayaw na ayaw kong marinig muli ang inyong mga kwento

ayaw ko na ngang pakinggan sa unang pagkakataon

Pero uupo pa rin ako rito

Makikinig

Ito ang aking ambag

pagkilala at paggalang

sa inyong dalamhati

sa inyong tapang

sa inyong kawalang-kapaguran

sa inyong mga sakripisyo

sa inyong magiting na anak, Nanay

sa iyong pagpaslang ng mga bangungot, Pare

Sige po

Nanay Linda

Pareng Raymond, tukayo

Habang di kayo napapagod

hindi tumitigil

Na magkwento

Makikinig ako.

                                                --5:00 n.h.

                                                20 Oktubre 2011

                                                Palihang Graciano Lopez Jaena

                                                Dalubhasaan ng Komunikasyong Pangmadla

                                                Unibersidad ng Pilipinas

                                                Lungsod Quezon